SHIT PONY é o novo proxecto que comparten o artista multidisciplinar Snob Megalove e a musa punk Alex KoploBitch. Ningún dos dous sabe tocar instrumento ningún, así que desta volta enredaron ao Ionqui Estadella, afamado guitarrista de Power Metal Sinfónico, para que lles fixera o traballo sucio.

DAGON é o segundo single de SHIT PONY, un furolazo de Garaxe-Punk-Pop Lovecraftiano que nos fala de amor, praia e monstros mariños.

Co seu anterior single, SHIT PONY acadaron grande éxito no certame da canción violenta Berrobambán's Pressing Catch, sendo escollidos entre os gañadores co voto unánime do xurado. Snob Megalove e Alex Koplobitch son tamén integrantes de CREATIVOS CERO, a banda punk de culto que hai dous veráns puxera a bailar o Parlamento galego en pleno co seu "Antón Losada (Fiquei Namorada)".