Vieiros

María Reimóndez Meilán (Lugo, 1975) é tradutora e intéprete. Adentrouse na poesía con Moda Galega (Edicións Positivas, 2002), e no ano 2003 recibiu o premio de novela Mulleres Progresistas de Vigo polo obra O Caderno de Bitácora (Edicións Positivas, 2004), o simpático diario de navegación polo mundo da capitana m. reimon. En Xerais xa publicara a novela xuvenil Usha, que aborda, dende o seu ollar feminista e comprometido, a cultura hindúa a través dos ollos dunha rapaza. De feito, é fundadora e presidenta da oenengué de Cooperación ao Desenvolvemento Implicad@s no desenvolvemento, que leva traballando dende o ano 1998 en proxectos de desenvolvemento integral, cun claro compromiso pola superación da discriminación de xénero como base do desenvolvemento perdurábel na India e Etiopía. Recentemente puidemos vivir en directo a súa viaxe a Etiopía grazas as crónicas que fixo para Vieiros. Forma parte do grupo de investigación Feminario de Investigación: Feminismos e Resistencias (Teorías e Prácticas) da Universidade de Vigo, onde realiza a súa tese sobre a interacción do Feminismo, Poscolonialismo e a Tradución.