Vieiros

O documento, que foi elaborado polo Instituto Galego das Cualificacións, amosa que as traballadoras acceden a categorías profesionais máis baixas, con retribucións inferiores e contratos precarios. Por se isto fora pouco, as desigualdades de xénero nos soldos medran a medida que aumenta a categoría laboral: as directivas só cobran o 68,5% dos seus homólogos varóns. As mulleres tamén teñen que afrontar unha taxa de desemprego moito máis elevada: 20% de paro feminino fronte ao 9,6 masculino, unha situación de desigualdade peor ca a que se dá a nivel estatal. E todo isto a pesares de que o 50,2% da poboación en idade de traballar son mulleres.

Na presentación dos resultados, o conselleiro de Traballo, Ricardo Varela, explicou que un dos motivos polos que as mulleres non se están a incorporar ao mundo laboral é o feito de que hai moitas que non se animan polas escasas e pouco atractivas oportunidades que se lles presentan. Malia isto, a consellaría ten presentes as metas fixadas polo Cumio de Lisboa da Unión Europea do ano 2000, que aspira a acadar unha taxa de emprego do 70% para a poboación en xeral e do 60% para as mulleres en particular de cara ao ano 2010. Ese é un dos obxectivos da Lei do Traballo en Igualdade das Mulleres de Galiza, que se está a debater no Parlamento. Así mesmo, os orzamentos da consellaría para vindeiro ano inclúen un total de 138 millóns de euros para superar a discriminación laboral feminina.