Vieiros

A Consellaría notificoulle ao Concello, este mércores 19, que "a execución das obras implica a realización de movementos de terras que suporían a destrución deses restos ou elementos físicos do camiño orixinal, o que impediría, por unha banda, a comprobación dos datos alegados polo recorrente e, por outra, de ser o caso, a súa preservación". Agora, o persoal técnico especializado da Consellaría realizará un estudo para confirmar a existencia desa traza e, de existir, avaliar até que punto poden as obras supor unha agresión.

Xa que logo, suspéndese temporalmente a resolución anterior, do 29 de marzo, en que a Dirección Xeral de Patrimonio Cultural autorizaba o proxecto de urbanización do sector PP1 do PXOM, para a creación dun parque empresarial na zona. As condicións eran respectar o trazado oficialmente recoñecido do Camiño de Santiago, coa mantenza dunha zona verde arborada de 30 metros a cada banda do camiño e a construción dunha pasarela de madeira para o tránsito dos peregrinos. A utilidade industrial da área incluíase no Plan Xeral aprobado en febreiro do 2004.