Vieiros

O Comité Cidadán de Emerxencia e diversos colectivos sociais ferroláns subliñaron durante a xornada a súa solidariedade coa acción promovida pola asociación de veciños O Cruceiro de Mehá.

Nun escrito que foi entregado no rexistro municipal do Concello, os veciños afectados pola instalación da planta de gas natural licuado manifestaron a súa "preocupación e indignación" pola desinformación á que aseguran verse expostos en relación ao Plan de Emerxencia Exterior aprobado o pasado 2 de xullo por Protección Civil e finalmente aprobado polo Consello da Xunta o pasado 19 de xullo. "Sendo veciñas e veciños dos máis directamente afectados queremos coñecer con exactitude o Plan", esixen, indicando a súa total oposición a que se aprobe a autorización definitiva de funcionamento para a planta.

Organizados a través da plataforma de veciños O Cruceiro, hai xa anos que presentaran alegacións ao proxecto, alertando de que a regasificadora se estaba construíndo apenas a 80 metros da casa máis próxima.

Aseguran que o peche seguirá até que as demandas sexan atendidas. Os veciños piden o apoio da corporación municipal para a solicitude de entrevista con Francisco Barroso Palomino, director da Área de Industria e Enerxía da Coruña, de quen depende a autorización final de explotación a Reganosa. Tamén piden que lles reciba a Dirección Xeral de Protección Civil de Galicia, entidade á que acusan de promover "indebidamente" o plan de emerxencia aprobado pola Xunta o pasado xoves 19 de xullo.