Vieiros

O ciclista galego do Karpin Galicia David García finalizou en sexta posición a decimocuarta tirada da Vuelta 2007 deste sábado, entre Puerto Lumbreras e Villacarrillo, cun percorrido bastante irregular e catro portos de terceira categoría, despois de marchar fuxido con outros nove corredores durante moitos quilómetros.

Porén, a pouco de chegar á liña de meta, o estadounidense de Honolulu Jason McCartney, do equipo Discovery Channel, abandonou o grupo e conseguiu renda de abondo para acadar a vitoria. A 29 segundos chegou o sueco Thomas Lövkvist e a 50 David García e o resto de fuxidos.

O pelotón perdeu algo máis de dez minutos. Na clasificación xeral as cousas seguen igual para Ezequiel Mosquera. O do Karpin Galicia mantén a quinta praza a 4:35 minutos do ruso Denis Menchov, que mantén o xersei dourado, na véspera da tirada con liña de meta en Granada. A deste domingo conta con dous portos de terceira categoría e un de primeira.