Vieiros

A capital do Deza vestiuse esta fin de semana de festa. Máis de 50 mil amantes do bo comer achegáronse até Lalín este domingo para saborear o seu afamado cocido. Mentres a maioría dos veciños do municipio optaban por celebrar a cita nos seus fogares, a xente de fóra desbordou as ducias de restaurantes e bares que ofrecen cocido.

Mais antes de chegar a cita co prato, a xornada principiou no auditorio da localidade onde se presentaron a coñecer os novos comendadores do cocido. Xa na rúa, antes do pregón, o alcalde de Lalín, Xosé Crespo, e os veciños presentes lembraron o finado Xosé Cuíña.

A festa volveu ás rúas de Lalín da man das polémicas garotas do Brasil, tal e como decidiran os veciños nunha particular votación. A pesar das críticas e dos reparos do propio rexedor local, o grupo de batuqueiros e garotas foi un dos máis celebrados da mañá.