Vieiros

Os últimos datos dos que dispón o Servizo de Normalización Lingüística da Universidade da Coruña, UDC, indican que apenas o 8,9% dos profesores e profesoras desta institución usan o galego para as súas clases. Por outro lado, só o 13,4% dos alumnos bota man do galego cando fai preguntas en voz alta nas aulas. Son exemplo de cifras que quedan lonxe da realidade do "emprego real" que se fai dela fóra do ámbito docente.

Por este motivo, a Universidade da Coruña deseñou unha campaña co obxectivo de "rachar esa fronteira lingüística" que aparecería ao cruzar a porta das aulas universitarias. A campaña foi presentada xa a semana pasada polo reitor da UDC, Xosé María Barja, acompañado polo secretario xeral, Xosé Manuel Carril, e mais polo director do Servizo de Normalización Lingüística, Xosé Ramón Freixeiro Mato. Adhesivos e cartaces coma o que acompañado dun aramado de espiñas contén o lema "Traspasa esta fronteira. Nas aulas tamén en galego", aparecen nas paredes dos centros da UDC desde esta semana.