Vieiros

O presidente de Colombia, Álvaro Uribe, anunciou este martes que denunciará ante o Tribunal Penal Internacional (TPI) o presidente de Venezuela, Hugo Chávez, por "patrocinar o terrorismo", segundo informou Caracol Radio.

"Hoxe, Camilo Ospina, o noso embaixador en Nacións Unidas anunciará que Colombia se propón denunciar ante a Corte Penal Internacional, a Hugo Chávez, presidente de Venezuela por patrocinio e financiamento de xenocidas", declarou Álvaro Uribe.

O mandatario baseará a súa denuncia nos documentos confiscados ao número dous das FARC, Raúl Reyes, abatido polo Exército colombiano o pasado sábado, e que a xuízo de Bogotá revelan os vínculos entre a guerrilla e o goberno de Hugo Chávez.

"As FARC negocian material radioactivo"
Por outra banda, o vicepresidente do goberno de Colombia, Francisco Santos Calderón, asegurou este mesmo martes en Xenebra que as FARC "estarían negociando material radioactivo co fin de fabricar armas sucias de destrución e terrorismo".

As declaracións, realizadas ante a Conferencia de Desarme da ONU, están tamén baseados segundo dixo nos documentos confiscados a Raúl Reyes. Precisamente, a guerrilla deu a coñecer a través dun comunicado enviado á Axencia Bolivariana de Prensa, que Milton de Jesús Toncel, mais coñecido como Joaquín Gómez, será o seu sucesor.