Vieiros

“De inmediato”, así o anunciou a conselleira de Cultura, Ánxela Bugalo. O departamento da Xunta ten previsto remitirlle esta mesma semana á Audiencia Nacional un censo de vítimas da represión franquista en Galiza. O listado que elaborou no seu momento a consellaría conta con datos de máis de 14.600 persoas represaliadas (3.588 delas foron asasinadas). Ademais, Cultura tamén anunciou que poñerá a disposición do xuíz Baltasar Gazón un mapa con 305 “lugares de represión”. Este documento localiza 26 foxas e 11 lugares da costa onde se fondearon cadáveres.

A documentación que partirá cara Madrid nos vindeiros días é froito dun traballo, 'As vítimas, os nomes, as voces, os lugares' que no seu momento impulsou a Consellaría de Cultura e no que participaron as tres universidades do país. Bugallo lembrou que "o único xeito de poder xulgar a verdade é coñecéndoa". Á mesma vez, a conselleira dixo que, contra o que algúns sosteñen, a verdade "non ten que facerlle mal a ninguén". Con este movemento, a Xunta dá un importante paso para constribuir ao proxecto de Baltasar Garzón, que pretende elaborar un censo estatal de desparecidos logo do golpe militar de 1936.

O coordenador do traballo histórico, o profesor Lourenzo Fernández Prieto, lembrou que o estudo sobre a represión en Galiza aínda non rematou e que polo de agora a documentación concéntrase no período 1936-39. Porén, xa se traballa na represión dos anos posteriores. Neste senso, a conselleira insistiu na necesidade de que outros departamentos da Administración galega colaboren para esclarecer o acontecido.