Vieiros

A Forza Aérea brasileira avistou restos de metal e do que poderían ser asentos dun avión a máis de 650 quilómetros do arquipélago de Fernando de Noronha, ao noroeste do Brasil. Aínda que non se confirmou, estes restos poderían ser os do avión de Air France que cubría a ruta Rio de Janeiro-París e que desapareceu este luns.

Segundo un voceiro da Forza Aérea, Jorge Amaral, os restos apareceron pasadas a unha da madrugada (seis da madrugada en Galiza). Os avións do Exército tamén avistaron manchas de combustíbel nesta zona do océano. As autoridades brasileiras tamén informaron do achado dun posíbel foco de incendio no medio do Atlántico que estaba a investigar por se fosen os restos do avión de Air France, desaparecido con 228 persoas a bordo.