Vieiros

Se Costa Rica é noticia no plano internacional pola inédita chegada dunha muller ao temón político do país, a socialdemócrata Laura Chinchilla, nas páxinas de cultura escribiuse en letra ben máis pequena outro capítulo importante. Trátase do primeiro filme costarricense dirixido por unha directora: Auga Fría de Mar, longametraxe á fronte da cal estivo Paz Fábregas.

A película acaba de competir na sección oficial do Festival de Rotterdam, e alí conseguiu o máximo galardón outorgado polo xurado internacional, que valorou a "magnífica edición que constrúe un orgánico fluxo de imaxes mentres que a súa intensa dirección crea unha inquietante atmosfera e tensión". E parte dese éxito correspóndelle á empresa galega Tic-Tac, que apostou polo proxecto en coprodución entre outras coa local Temporal Films, a francesa Le Films du Requin, e a neerlandesa Isabella Films. O filme conta a historia dunha parella que pasa a noite na costa onde atopa unha rapaza que escapou da casa.

É ademais a primeira iniciativa de ficción na que participa Tic-Tac, que até o de agora se centrara documentais de xoves realizadores, afondando nas coproducións co ámbito latinoamericano. En breve, outro prometedor proxecto sairá ao seu abeiro, o novo traballo de Jorge Coira, baixo o título 18 Comidas.