Vieiros

O Pazo de Cultura de Narón acolleu a gran festa do audiovisual galego. Pero, ademais de celebración, tamén houbo espazo para a crítica e o compromiso. Un dos primeiros en turrarlle das orellas ao Goberno dende a tribuna foron os galardoados de Onda Curta, programa especializado en curtametraxes que deixou de emitirse co cambio na Xunta. Carlos Meixide dedicoulle o premio ao resto de nominados (que tamén caeron da programación da TVG) que “están no paro” e sentenzou “algo debemos facer ben”.

Houbo numerosas reivindicacións a prol da lingua no acto, con chanzas varias sobre o trilingüismo. Pero o momento máis incómodo para a delegación da Xunta, que encabeza o conselleiro de Cultura, Roberto Varela, chegou coa intervención do director de fotografía e realizador Enrique Banet. Nun longo discurso, Banet lembroulle ao sector que é preciso “demostrar o compomiso co país” e denunciar situacións como a destrución do Courel ou a contaminación da ría de Ferrol. O galardoado sinalou que o país non pode quedar nas mans de “catro multinacionais”. Tamén arremeteu contra a TVG e pediu un medio “libre, sen censura e profesionalizado”.