Vieiros

Logo do grave caso de contaminación do marisco detectado na ría de Corcubión en 2004, e que impediu extraer moluscos durante anos, a factoría de Ferroatlántica, con sede en Cee e propiedade do grupo Villar Mir, reconduce máis de 20 mil toneladas de refugallo tóxico a unha canteira de seixo no lugar de Brea, en Carballo.

Tal e como lles temos contado anteriormente, a operación é realizada de xeito concreto pola empresa Desguaces Lema, que durante sete meses amorea os contidos contaminantes froito das viaxes de dous milleiros de camións no monte e lagoa desta mina. "O escuro episodio dun suposto xestor de residuos que fixo o traballo sucio con total desprezo á lei", denuncian os ecoloxistas, recordando que o acontecido está documentado en expedientes da Xunta, o Seprona, Augas de Galicia e o Concello de Carballo.

Segundo comunica esta semana o colectivo ecoloxista Verdegaia, o xulgado de instrución nº3 de Compostela dálle adiante ás dilixencias previas do expediente relacionado con esta vertedura. Alén do delito ecolóxico, no auto, o xuíz admite ademais os indicios de prevaricación por parte de Joaquín Buergo del Río, daquela director xeral de Calidade Ambiental. O ex alto cargo fora denunciado pola veciñanza por un informe que en 2008 facilitou o sobresemento da causa por delito ambiental que se levaba a cabo nos xulgados de Carballo. Lembrámoslles a preocupación social na zona polas afeccións que puidesen acontecer nos mananciais próximos, as dúas piscifactorías de troita do concello, a flora e fauna silvestre, o gando e a propia saúde das persoas do lugar.

Indicios "claros" de prevaricación
O xuíz advirte agora a "falta de realidade" na información achegada polo director xeral ao trasladar datos "que non só non se corresponden, senón que mesmo se contradín e ocultan os datos dos que dispuña ... silenciando o incumprimento de resolucións da administración ou obstaculizando, ao tempo, a actuación da devandita administración...".

O auto asume tamén os indicios de delito ecolóxico e abre dilixencias para a súa investigación, incorporando as achegas pola parte denunciante e as do fiscal do ambiente, Álvaro García Ortiz. O colectivo Verdegaia fornecera a fiscalía cun detallado informe en denuncia do caso, con indagacións e probas concretas, no mes de decembro pasado. Segundo subliña o auto do xuíz compostelán, a responsabilidade penal neste presunto delito ecolóxico "cabe extendela, non só aos causantes ou titulares da fonte de contaminación, senón mesmo aos administradores públicos...".