Vieiros

Chegou a hora da unidade. Esta é a mensaxe que lanzou este martes o secretario xeral de EA, Unai Ziarreta, nunha entrevista en Radio Euskadi. O dirixente nacionalista di que é precisa unha coalición co PNV para afrontar con éxito as eleccións xerais. Ziarreta lembrou que nos vindeiros anos “hai que dar unha sensación de forza e unidade de que aquí hai un pobo que quere superar a situación actual”. O dirixente de EA negou que este chamamento teña que ver coa posibilidade de perder a representación parlamentaria en Madrid.

Con respecto a se tiña preferencias por Zapatero ou Rajoy, Ziarreta explicou que “ten a súa importancia quen gane” de cara á política do Estado en Euskadi. Porén, matizou que nestes catro anos de goberno socialista non houbo “grandes cambios” en relación co conflito vasco. Mais considera que “se o PP chega ao goberno, van vir mal dadas para os vascos”.