Vieiros

A confusa refundación do Partido Popular en Nafarroa ofrece un episodio no que lle toca aos vínculos con Euskadi. Así, a declaración de principios presentada polo novo PP navarro inclúe un apartado onde de xeito específico se pide a derrogación da disposición transitoria cuarta da Constitución. Isto é, propoñen eliminar a vía constitucional para a unión de Nafarroa con Euskadi vía referendo. Paradoxalmente, o mesmo documento incorpora deseguido unha reflexión onde se afirma que calquera "alteración" do estatus actual de Nafarroa no marco da Constitución do Estado Español como comunidade foral "propia e diferenciada" debe levarse a cabo "coa decisión que o pobo navarro exprese libre e democraticamente nun referendo".

A derrogación da disposición constitucional ao respecto era xa unha petición básica do proxecto de UPN, e a súa posta en cuestión foi precisamente un dos condicionantes do nacemento desa formación a partir dos restos da UCD. Por outro lado, na presentación ao público das novas caras visíbeis do PP en Nafarroa, púxose de manifesto que logo da crise recente é improbábel que a curto prazo as dúas formacións políticas poidan recuperar a unidade de acción. O presidente da comisión constituínte, José Ignacio Palacios, dixo que o grupo promotor da refundación pertence á "dereita templada".

Noutros medios:

• No Diario de Noticias: O PP xustifica o seu regreso a Navarra pola conversión de UPN en refén do PSN
• En Público: O PP acepta o dereito de Navarra a decidir
• No Diario de Navarra: O PP "desembarca coa intención de ser primeira forza" en Nafarroa