Vieiros

"A modalidade elixida permite unha maior solidariedade, centrando as axudas nas familias con menos recursos ao contrario que o anterior modelo que outorgaba cobertura universal, fose cal fose o nivel de renda", expoñen esta sexta feira desde a Consellaría de Educación. Un argumento engadido ao respecto da iniciativa avanzada hai días polo presidente da Xunta e presentada formalmente este venres é que lle "devolverá a estabilidade ao sector do libro, afectado profundamente polo sistema de préstamo e que vía como os seus ingresos variaban cada ano en función dos cursos que se tiñan que renovar".

O terceiro argumento en favor desta medida é o aforro que avalían será posíbel para a caixa pública. Segundo os datos manexados pola consellaría de xeito concreto para o vindeiro curso 2009-2010 e de solicitaren a axuda todas as familias do país que entrarían no baremo, a Xunta gastará 9,7 millóns de euros fronte aos 14 millóns que o bipartito calculaba gastar ese mesmo curso. Din desde o Goberno que con esas cifras e garantindo un aforro do 30% durante catro anos, o gasto acumulado necesario até 2013 segundo o modelo anterior, un total de 70 millóns de euros, quedará para daquela en 49 millóns.

"O modelo anterior de café para todos era unha enganosa medida universal completamente independente do nivel de ingresos, e que non reparaba nas necesidades específicas das familias, o que provocaba ademais un gasto moi elevado por parte da administración", xustifica a consellaría de Educación.

A bolsa cubrirá a totalidade do gasto en libros para familias con ingresos de ata 5.400 euros anuais por persoa no fogar –ou ata 6.000 euros, se a familia é monoparental- cunha axuda máxima de 180 euros por cada neno. Para as familias con ingresos entre 5.400 e 9.000 euros por persoa no fogar –ou entre 6.000 e 9.000 euros no caso das monoparentais-, a consellaría garante unha axuda aproximadamente da metade do custo. No caso de alumnado de Educación Especial a bolsa será de até 250 euros.