Vieiros

Un total de 193.244 alumnos de educación infantil e primaria de Galiza inician esta quinta feira o curso escolar, en que o decreto do galego segue a estar vixente, marcado pola polémica sobre as axudas para a compra de libros de texto e a inquietude sobre a gripe A.

Segundo datos da Consellaría de Educación, este curso contará con perto de dous mil estudantes máis e un notorio aumento de alumnos de orixe estranxeiro, que suma en ambos os dous ciclos un total de 828 crianzas.

O alumnado matriculado en primaria ascende a 128.174, dos que 88.303 estudarán en centros públicos, 37.280 en centros privados con subsidios públicos (concertados) e outros 2.591, totalmente privados.

En educación infantil figuran inscritos un total de 65.070 alumnos, dos que 44.657 están en centros públicos, 18.799 en centros privados con axudas públicas e 1.614 en institucións completamente privadas.