Vieiros

Un xurado popular ditaminou este venres que dous ex concelleiros do PP de Gondomar, Alejandro Gómez e José Luís Mosquera, e o arquitecto Borja Ramilo son culpábeis de tres delitos de suborno. A sentenza considera probado que os tres procesados pediron cartos a promotores a cambio de favorecer determinados convenios urbanísticos.

As probas principais foron as declaración dun dos procesados, as escoitas telefónicas que descubriron o caso e diversas testemuñas recollidas no xuízo. Así o edil José Luis Mosquera terá que facer fronte a unha multa de 135 mil euros, Alejandro Gómez terá que pagar algo máis dun millóns de euros e quedará inhabilitado para cargo público. No caso do arquitecto, a sanción será de 70.500 euros. Este último e Mosquera viron reducidas as sancións ao teren colaborado coa xustiza.

Os feitos tiveron lugar no ano 2007, cando o consistorio estaba gobernado polo rexedor do PPdeG Carlos Silva. En febreiro dese ano, a Garda Civil detivo a José Luís Mosquera cando se reunía nunha cafetaría de Vigo para recoller un suborno de 60 mil euros.