Vieiros

"Perversión democrática" foi a definición escollida este luns por Marisol Soneira, secretaria de Políticas Migratorias do PSdeG, para referirse ás prácticas de Rafael Louzán, presidente da Deputación de Pontevedra, durante unha visita a Uruguai.

O motivo: o acto celebrado en Montevideo onde se lle esixía aos emigrantes que levasen o Documento de Identidade ou o pasaporte para que o PP lles realizase os trámites necesarios para votar nas vindeiras eleccións municipais.

A socialista acusou aos populares de entregarlle a representación da Deputación "a un único partido político o seu" e "avalar prácticas mafiosas como as de roubar a sinatura e o pasaporte de todos aqueles que de boa fe pretenderon asistir a un acto que pensaban que era da institución e resultou ser do Partido Popular". Soneira lembrou que xa en comicios anteriores os populares convidaran aos emigrantes a ir votar "á sede do PP, por baixo dunha gran foto de Fraga".

Iniciativa parlamentaria
Diante do acontecido, o deputado do BNG Iago Tabarés presentou unha iniciativa parlamentaria onde se fai eco do suceso, solicitándolle ao secretario xeral de Emigración que investigue o suceso fronte á posibilidade de que acontecese o mesmo noutras ocasións.

O deputado nacionalista tamén propuxo que se adopten medidas que eviten casos similares e freen todo procedemento irregular e intento de manipulación dos electores na emigración. Nesa liña, suxeriu facer campañas divulgativas na diáspora para "advertir da existencia de prácticas contrarias ás garantías democráticas".