Vieiros

É lícito que un club redacte e publique un documento político sen informar previamente os seus asociados? Á directiva do Clube Financeiro de Vigo non lle tremeu a voz á hora de presentar un informe titulado “Política lingüística. Unha visión empresarial”. O denominado “caderno para o debate” dá a particular visión do clube vigués sobre a normalización lingüística. Na análise afírmase que o castelán “desapareceu ou ocupa un lugar residual” no ensino primario e secundario para concluír que o decreto de galeguización provoca que haxa moitos altos exectivos con fillos en idade escolar se neguen a traballar en Galiza. Mais os primeiros datos demostran que o informe presentado publicamente non foi consultado cos socios (grandes empresas e institucións da área metropolitana de Vigo).

O mesmo martes a Universidade de Vigo advertía que non coñecía o contido do informe e referendaba o seu compromiso co idioma. Este mércores, houbo máis reaccións de representantes de institución públicas con presenza no Club Financeiro de Vigo que mostraron publicamente o seu “malestar” logo de coñecer un documento do que non tiñan ningunha constancia.

O tenente de alcalde do Concello de Vigo (institución asociada ao clube), Santiago Domínguez, desafiou aos responsábeis do Clube Financeiro retándoos a que “presenten un neno que teña problemas para falar e estudar en castelán”. Domínguez asegura que o documento é unha escusa para crear polémica e sinalou que varios empresarios chamárono “escandalizados” polas conclusións do informe.

Outro exemplo é o do alcalde do Porriño, o nacionalista Raúl Francés. O rexedor, visibelmente enfadado, anuncioulle a Vieiros que vai enviar unha carta formal de protesta á directiva do Club Financeiro de Vigo. Francés, que considera que o informe semella unha disparatada “opinión de taberna”, reitera que ninguén se puxo en contacto coa institución que preside e que forma parte da entidade empresarial. Por iso vai pedir explicacións.

Tamén se posicionou Xestur-Pontevedra, un organismo público, dependente da Consellaría de Vivenda, que tamén participa no club empresarial. Fontes oficiais de Xestur consideran que a análise “non responde á realidade”. Dende esta entidade lembraron que a lingua é sempre un “valor engadido”. Tamén negaron radicalmente que as políticas de normalización obstaculicen a chegada de executivos. Neste sentido, afirman que “en Galiza hai xente capacitada de sobra para ocupar estes cargos”. Como exemplo, sinalan que o proceso é xustamente o contrario, xa que son este tipo de traballadores os que teñen a miúdo que buscar o futuro fóra do país.

• Anterior: O Clube Financeiro de Vigo sostén que "o español desapareceu do ensino"