Vieiros

O financiamento autonómico será un dos temas máis destacados no traspaso de poderes que se producirá no vindeiro mes de abril. Así o destacou o conselleiro de Economía en funcións, Xosé Ramón Fernández Antonio, quen descartou calquera tipo de decisión neste campo, xa que provocaría "unha ralentización no despacho dos asuntos públicos". Asemade, insistiu en que facelo sería "comprometer unha decisión estratéxica e de futuro" do próximo executivo.

A vitoria do Partido Popular nos últimos comicios electorais obrigou ao goberno español a atrasar o acordo sobre financiamento e o Ministerio de Economía xa anunciou que non convocará ao Consello de Política Fiscal até que Feijoo tome posesión. Con todo, o conselleiro en funcións adiantou que o seu gabinete "contribuirá a unha rápida familiarización da nova equipa de goberno sobre este asunto".

Negociación difícil
Fernández Antonio asegurou que Galiza "está ben posicionada" neste debate a través dos principios e criterios incluídos nun documento que xa fora remitido ao Estado no pasado 30 de decembro e entre os que se atopan cuestións como a dispersión poboacional, o envellecemento ou a normalización lingüística, factores que implicarían a necesidade dun maior investimento. Do mesmo xeito recoñeceu que o debate implica unha "negociación difícil", e que "lle corresponderá ao vindeiro goberno culminalo".