Vieiros

A Vicepresidencia da Xunta vai destinar un total de 63,4 millóns euros en 2008 aos municipios para a prestación de servizos sociais, o que supón tres veces máis cós 18,5 millóns de 2004. O 'Plan de Financiamento de servizos sociais ás corporacións locais', presentado este luns polo vicepresidente do Goberno, Anxo Quintana, recolle este orzamento.

Haberá un mínimo de 39,5 millóns para a convocatoria anual de axudas directas aos municipios, namentres que os 23,9 restantes serán xestionados polo Consorcio de Servizos de Igualdade e do Benestar, integrado pola Xunta e por 236 dos 315 concellos do país. "Agardo que quede desmontada a idea de que a creación de entes como o Consorcio vai en contra da colaboración", salientou Quintana, en alusión ás críticas recibidas por parte do PPdeG e dalgúns alcaldes do PSdeG.

Neste senso, remarcou que a prestación dos servizos sociais require da coordinación entre distintas institucións, e admitiu que se precisa da participación dos municipios para poder cumprir o "grande reto" de construír o Sistema Galego de Benestar. "Trátase de implicalos na prestación activa destes servizos", engadiu a secretaria xeral do Benestar, María Xesús Lago, tamén presente no acto.

"Disipar dúbidas" á Fegamp
En concreto, este investimento terá como ámbito prioritario a aplicación da Lei de Dependencia, mais tamén contempla unha partida específica para a "execución de proxectos de desenvolvemento do pobo xitano".

Respecto a Lei de Servizos Sociais, que a Fegamp criticou por considerar que atenta contra a autonomía municipal e polas incógnitas sobre o seu financiamento, Quintana expresou o seu desexo de que este plan axude a "disipar dúbidas". A norma obriga aos concellos de máis de 20.000 habitantes a investir de aquí a seis anos polo menos o 7% do seu presuposto a políticas de benestar.